ANIMALIAK
GIPUZKOAKO ESKUALDEAK
MATEMATIKA
MUSIKA
THE BODY ARIKETA
miércoles, 30 de noviembre de 2016
lunes, 21 de noviembre de 2016
martes, 11 de octubre de 2016
lunes, 10 de octubre de 2016
3.ETAPA. Aurkikuntzak aurkeztu
Nire kartografian neure burua zuhaitz bat izango balitz bezala irudikatu dut. Oraindik guztiz osatu edo hazi ez den zuhaitz bat hain zuzen ere. Hasiera batean amaituta dagoen prozesu bat irudikatu dudala esan daiteke baina ez. Jarraian irakurriko duzuen moduan guztiak du zentzu edo esanahi bat lan honetan.
Oinarrian, zuhaitzaren sustraietan, nire bizitzako hiru pertsona garrantzitsuen irudiak ipini ditut. Hau azaltzeko laurok agertzen garen argazki bat jartzea izango litzateke aukera bat baina nahiago izan dut hiru argazkitan bereiztea, bakoitzarengandik gauza desberdinak ikasi baititut. Esaterako, nire amak sukaldatzeaz gain, indartsua izaten irakatsi dit, lortu nahi ditudan gauzetan amore ez ematen eta oztopoen aurrean aurrera egiten. Nire aitak bizikletan ibiltzen irakatsi zidan moduan, neure buruarekin, inguruan gertatzen denarekin besteek esaten dutenarekin kritikoa izaten ere irakatsi dit. Entzuten den guztia ez sinesten edo lehenengoz behintzat zalantzan jartzen. Azkenik nire anaia nire eredu izan da txiki txikitatik. Urtebete gazteagoa naizen arren txikiak ginenean berak egiten zuen guztia egin nahi izaten nuen: berak txupetea utzi zuenean nik ere horrelaxe egin nuen; bera oinez ikusten nuenean nik jarraitu egin nahi nion; irakurtzen hasten zenean nik ere liburu bat hartu eta bere alboan jartzen nintzen.
Enborrak nire orain arteko ikaskuntza prozesua irudikatzen du. Prozesu luzea izan denez zuhaitzaren atal luzeenetako batean kokatu dut. Guztia azaltzea oso zaila zenez eta nola egin ere ez nekienez, gainerakoekin partekatu nahi nituen zenbait gauza soilik aipatu ditut, hein batean niretzako esanguratsuenak izan direnak. Lehenengo HH eta LH mailak burutu nitueneko ikastetxearen logoa ipini dut, bertan ikasi bainituelako oinarri oinarrizko gauzak: irakurtzen, idazten … Eta bertan sortu bainuen nire lehenengo lagun taldea.
Adarren bidez nire lorpen batzuk irudikatu nahi izan ditut:lagun taldea, dantza taldea besteak beste. Hauekin ikasi baititut elkar lanean aritzen, enpatia izaten, gainerakoei laguntzen …
Amaituta ez dagoen adar batean ostera nire unibertsitateko ikasketak irudikatu ditut, oraindik amaitu gabe dagoen prozesu bat baita.
Bestetik hostoetan nire familiari, ikaskuntza prozesuari, lagun taldeari … esker eskuratutako eta ni definitzen nauten zenbait balore idatzi ditut:umiltasuna, esker ona, adiskidetasuna, zintzotasuna, ardura...
Nire bizitza markatu duten pertsona, eskola, transmititutako balore… garrantzitsuenak laburki azaldu nahi izan ditut. Bistakoa da guztiz amaitua ez dagoen zuhaitza dela, baina nire formazio eta ikaskuntza ere ez da amaitu. Izan ere beti dugu zer ikasi, hau sekula amaitzen ez den prozesu luze bat baita.
domingo, 9 de octubre de 2016
sábado, 8 de octubre de 2016
1.ETAPA. Datuak analizatu
Aste hauetan zehar gure ikaskuntza prozesuaren inguruan hausnartzeko eta ondoren hori irudikatzeko helburuarekin, zenbait jarduera egin ditugu. Lehenik eta behin, egingo dugun lana aurrera eraman ahal izateko, taldekideak nola komunikatuko garen erabakitzea izan da facebook, twitter, whatsapp…). Hori berehala erabaki dugu; guztientzat erosoena eta errazena whatsapp talde bat sortzea izan da bertan bakoitzaren lanak, ideiak, zalantzak … partekatzeko. Era berean, “drive” bat ere partekatu dugu irudiak, dokumentuak eta audioak bertan gordetzeko.
Ondoren, proiektuaren inguruan zein erronka, zalantza, helburu … ditugun azaldu behar izan dugu, hain barneratuak ditugun gauzak zein unetan eta nola ikasi edo ikasten ditugun konturatzea ez baita bereziki lan erraza. Lehenengo ideiak ateratzea izan da gehien kostatu zaiguna. Zerbait ikasterakoan kontzienteki jardun arren, urteak pasa ahala inkontzienteki egiten ditugun gauzak bihurtzen baitira, beste batzuk, aldiz, era inkontziente batean ikasten ditugu.
Horretarako, ikasitakoari erreferentzia egiten dion ebidentzia posibleak aipatu ditugu: argazkiak, txanponak, bidai txartelak … eta ondoren hori guztia nola irudika daitekeen eztabaidatu dugu: bideo bidez, album batean …
Proiektua nola burutu oso argi izan gabe ere aurrera jarraitu dugu. Oraingo honetan bakoitzak aproposak iruditu zaizkion ebidentziak astean zehar “drive” bidez partekatzeaz gain, gelara ekarri ditugu bai ebidentzia fisikoak, bai argazkiak. Hau guztiaren bidez gainerako taldekideei azaldu diegu ekarritako ebidentzia bakoitzak zer esan nahi duen guretzako eta zein ikasketa prozesu irudikatzen duen. Batzuek ikasitako edukiei egin diete erreferentzia, beste batzuek aldiz emozioei, harremanei, taldean lan egiteari … Honetan ondorio argi bat atera dugu: eskolan hainbeste urte igaro arren, gauza asko eta asko, eskolatik kanpo ikasten ditugula, hala nola, familian, lagunartean, komunikabideetatik eta abar. Honekin ez dugu esan nahi eskolan ikasten ez denik, bertan ematen dugun denbora guztiaren ondoren, emaitzak ez direla izan beharko luketen modukoak baizik.
Beraz, proiektu honen bidez konturatu gara askoz ere garrantzitsuagoak direla bakoitzak bere inguruan barneratutako balioak edota besteen anekdotetatik jasotakoa. Izan ere, nahiz eta emozioak ikasteko garaian ezinbestekoak ez izan, asko laguntzen digute enpatizatzeko eta haiekin bat egiteko. Bestalde, eskoletan eduki asko eman arren, gehienetan memorizazio bidez ikasten ditugu eta ez emozio edo istorio errealetatik.
Elkarrizketa jasotzen duten audio piezak irakaslearekin partekatu ditugu. Nola? Audio pieza ezberdinak youtube-ra igo ditugu eta linkak irakasleari bidali dizkiogu. Era berean, testu honetan dagokion lekuan audio ezberdinak estekatu ditugu.
0.ETAPA. Datuak jaso
Hasiera batean irakasleak kartografiaren proiektu hau gainetik azaldu zuenean ez nuen ezertxo ere ulertu, ez nekien nondik hasi, zer motatako ebidentziei egiten zien erreferentzia, nire ikasketa prozesua nola irudikatu … erabat galduta nengoen. Baina berehala irakasleak sarreratxo edo pixka bat gaiari heltzeko hainbat galdera proposatu zizkigun. Oso lagungarriak izan ziren lanaren eta lortu nahi ziren helburuen nondik norakoak ulertzeko. Honekin batera zenbait adibide ere erakutsi zizkigun.
Hau egin ondoren, nire ikaskuntza prozesua non eta noiz eman zen pentsatzeari ekin nion. Ez zen lan erraza izan, hain barneratuak ditugun jakintza, ezagutza … momentu jakin batean kontzienteki egiten ditugun arren gero inkontzienteki ateratzen zaizkigu. Esaterako irakurtzea: lehen hezkuntzan geundela irakasleak sarritan esaten zigun “ gaur irakurketa landuko dugu” eta une horretan bazenekien irakurtzen ikasten ari zinela … baina pixkanaka pixkanaka gaitasun hori lortzen ari zaren heinean barneratu egiten dugu eta gero ikaskuntza hori nola eta noiz eman zen jakiteko, prozesua atzerantz pentsatzeak baditu bere konplikazioak. Bestetik esaterako nire kasuan dantzak uste baino gauza gehiago erakutsi dizkit. Hasiera batean galdera hau eginda ( dantza taldean zer ikasi dudan) dantza egiten esango nuen. Baina gehiago sakonduz gero, honetaz hausnartzeko une bat hartuz gero lagun talde bat sortu dudala esan dezaket, hauengandik enpatia, laguntasuna, elkarlana … ikasi ditut era guztiz inkontziente batean, hainbat urte talde berean igarotzearen ondorio izan baitira.
Baina azkeneak ebidentzia batzuk lortu eta guztiak argazki bidez irudikatu ditut, azken finean modu erosoena zelako. Ikerketa lan honetan ondorio garbi bat atera dut, eta gainerako kideekin hitz egin ostean beraiek ere iritzi bera partekatzen dute: ikasi dugun asko esperientzia bidez ikasi dugu eta uste baino gauza gehiago eskola eta ohiko ikas eremuetatik at ikasi ditugu.
SARRERA. Nola ikasten dut irakasle izaten
• Nola egiten diozu aurre ikerketari?
Lehenik eta behin taldean bildu gara pixka bat elkarri laguntzeko, hausnartzen hasteko noiz, non eta zer ikasi dugun. Prozesuan zehar ebidentzia batzuk ekarri behar ditugunez zein motatakoak izan daitezkeen hainbat proposamen egin ditugu. Lanaren ideia garbiago izanik galdera hauei erantzuten hasi naiz, neure ikaskuntza prozesuan zentratzeko.
• Nolako galderak etortzen zaizkizu burura?
Zer ikasi dut?
Noiz ikasi dut?
Nola ikasi dut?
Norengandik ikasi dut edo nork irakatsi dit?
Orain arte ikasitako guztia baliogarria izan zait?
Kontzienteki ala inkontzienteki ikasten dugu?
• Zeintzuk izan daitezke erronkak?
Erronka handiena buruan dauzkadan ideia guztiak irudikatzea izango da. Zenbait kasutan zein ebidentzia erabil ditzakedan jakitea ere buruhauste bilakatu daiteke. Esaterako lagunekin egindako ikas bidai batean ikasi dudana ezin daiteke irudikatu, elkarbizitza, geure kabuz hiri ezezagunetan moldatzen … Horrelako adibideak besteek ulertzeko moduan irudikatzea ez da batere erraza izango.
• Zer gehitu diezaiokezu ikerketa-tailerrari?
Esperientzia eta ikuspuntu ezberdinak.
• Zer espero duzu ikastea?
Nire orain arteko ikaskuntza prozesuari buruzko hausnarketa bat egitea. Askotan esaten da eskolan ikasten ditugula gauza gehienak baina uste baino gauza gehiago ikasten ditugu hemendik kanpo ere. Beraz iturri desberdin horiek identifikatu eta horien inguruan emandako ikaskuntzaz gogoeta bat egin nahiko nuke.
Suscribirse a:
Comentarios (Atom)